لا تتراجع عن افكارك و لا مبادئك امام الاخرين

المشكلة إننا بقينا نخاف من بعض , بقينا نخاف من تفكير بعض !! وأد إيه ممكن يظن فيك الناس ظن سئ لخير إنت عملته أو لفكرة إنت بتدافع عنها ..بقينا نفضل الصمت الأبدي

ــ البنت اللي في العشرينيات من عمرها اللي دخلت عليك المترو وانت قاعد وخوفت تقوم لمجرد إن الناس متفكرش إنك قومت علشان ؛ كما يقولون ؛ حكاك ..

ــ الكلام اللي نفسك تقوله للناس من زمان ولو حتي في بوست وكل يوم بتكتبه هنا

وتقعد تقرأ فيه مرة واتنين ولما تنزله مع أول واحد يهاجمك بتمسح الكلام فوراً وبتقرر تحتفظ بيه لنفسك ..

ــ حتي البنت اللي بتلبس لبس مش علي الموضة أعتقد هي الأخري أصبحت تخاف من نظرات الناس وقولهم " إيه ده دي الموضة دي انتهت , هو لسة حد بلبس كدة دلوقتي "

ــ حتي زميلتك في الدراسة اللي بتخاف تطلب منها حاجة في إطار الدراسة للدفعة المحترمة بتاعتك تقول عليك لفظاً " بتحبها " وخلاص كتبوهالك وممكن يسمولكم عيالكم كمان ..

ــ لو شوفنا ولد بيعاكس بنت في الشارع  بقينا نخاف نقوله " إحترم نفسك ودي زي أختك " ونقول بكل بساطة " ياعم وأنا مالي هو أنا ناقص "

ــ بقينا نشعر بالشفقة علي المتحرش لما يتمسك بجريمته ونشوف دموعه بنبدأ نترجي الشخص اللي سببله أذي إنه يسامحه , مع إنه قانوناً مجرم ويجب عقابه , وعُرفاً مجرم ويجب عقابه ..

.

إحنا شوهنا كل حاجة ياجماعة للأسف , عاداتنا تحورت بقيت قيود وتحولت لمخاوف والنخوة أصبحت " حك " .. بقينا نفكر كلنا  زي بعض اللي هو نفس ال 100 شخص اللي ماشين في الشارع في لحظة تحرش يقولوا " وأنا مالي " .... إحنا بنموت ببطأ

أتمني من الله ألا أُطيل المكوث هنا ...

اهمال العلم لدى الشعوب العربية مسئولية مين ياترى !!!

ليه الشعب بتاعنا مش علماء, ليه مش بيهتموا بالعلم ؟

كل دي تساؤلات إجابتها بتدين الشعب او أهل الدولة , ولكن اللي متعرفوش إن الشعب لايملك أي حق في تحديد مصيره , الإتجاه العام للشعب الدولة اللي بتتحكم فيه , وأخص بذلك الحاكم بتاع الدولة .

بمعني إن لو الحاكم إهتم بالعلم والتعليم هتلاقي الشعب مهتم بالتعليم والعلم وهكذا , لو مهتم بالتسليح والصناعة الحربية هتلاقي الشعب كله مهتم بده وبيتابع التطورات , لو مهتم بالاصلاح الإقتصادي هتلاقي الشعب كله بيسأل عن الأسعار ..

في كتاب " الكامل في التاريخ " لإبن الأثير بيقول :

كان الوليد بن عبد الملك صاحب بناء واتخاذ المصانع فكان الناس يلتقون في زمانه فيسأل بعضهم بعضاً عن البناء , وكان سلمان صاحب طعام ونكاح فكان الناس يسأل بعضهم بعضاً عن النكاح والطعام , وكان عمر بن عبد العزيز صاحب عبادة فكان الناس يسأل بعضهم بعضاً عن الخبر : ماوردك اليوم وكم تحفظ من القرأن وكم تصوم الشهر ...

معني كدة اللي بيتحكم في التوجه العام للشعب وشكل المجتمع هي سياسة السلطة ومنهجها , في جملة تنسب لعلي بن أبي طالب بيقول " الناس بأمرائهم أشبه منهم بآبائهم " ..

في القرن الثامن عشر كان فيه فيلسوف فرنسي اسمه هلفيتيوس قال :

إن التفاعل بين المجتمع والدولة ذو اتجاه واحد , فالشعب لايؤثر في طبيعة الدولة وانما تؤثر الدولة في خصائص الشعب وأخلاقه ....

الراجل استنتج إن الدولة مسئولة عن مساوئ الشعب وبرضة عن محاسنه .

دارى على شمعتك تقيد مثل شعبي صادق

مش لازم تعرف الناس اي حاجة تحصلك ، الحاجة اللي هتديهم دافع قولهم عليها غير كدة متقولش لحد اي حاجة من اخبارك . كل ذي نعمة محسود ياعزيزي ، واستعينوا علي قضاء جوائجكم بالكتمان ...

خليهم يتفاجئوا بإنجازك . لو حابب تشارك الناس اللي عملته قولهم عادي

حزنك ،فرحك،تعبك ،تعليمك احتفظ بكل حاجة لنفسك .

خططك كلها واهدافك تبقي ليك انت ، لو عاوز تقول لحد يبقي اقرب الاقربين ليك وتكون متأكد انه مش هيسفهك ولايقلل من قدرك ،ولا هيحبطك ..

ارسم الطريق كويس جدا لهدفك  وحط خطة Aوخطة B علشان لو حصل حاجة ، متخليش اي ظروف تقف في طريقك ..بطل تحط مبررات لفشلك واحباطك ، وبطل تبص للناس وتقول ان فلان ظروفه احسن منك وطبيعي يبقي هو افضل منك .

مش كل مرة تفشل فيها يبقي المرة اللي بعدها هتنجح بإعتبار ان انت توماس اديسون حاول بقدر الامكان تخلي النجاح من اول مرة ،مفيش محاولة تانية ..

خد كورسات كتير وابحث في مجالك واقرأ كتير ،ونزل مراجع والزم نفسك بالقراءة ..

انت في سباق ياصديقي وقد تجد من يتسابق بقدم واحدة والاخر يبدأ الطريق من منتصفه ،واحدهم يبدأ معك ولكن الكل يحمل هدف واحد وهو الوصول للقمة ، وانتم في نظر الحكام والمشاهدين متساوون في الظروف .

ساعدوا بعض ،واعينوا بعض علي اهدافكم .

حبوا بعض ونقوا قلوبكم ❤

العبرة بالخواتيم لا تنخدع ببدايات الامور

النهاردة صحيت من النوم وأنا عندي قناعة رهيبة إني أقدر أخلص حوالي خمس كتب النهاردة بس وانا مرتاح جداااا وعندي طاقة عالية أووووي ..

واحد بيحكي بيقول :

في يوم كلمت صديقي وطلبت منه إني أجري معاه , لأني كنت حاسس بطاقة غريبة وإني أقدر أتخلص من عاداتي السيئة في يوم وأرجع صحتي زي ماكانت ..

للأسف أنا كنت مدخن شره جداً , ومع ذلك ومع إني عارف قدراتي الجسدية السيئة قررت أتحدي صديقي ده في الجري !!

معرفش أنا كنت بفكر في إيه بالضبط , بس كل اللي كان في دماغي إني هقدر أغلبه بسهولة , مع إنه شخص رياضي جداً ومواظب علي الجري من سنوات , بس كنت مقتنع إني هقدر أتغلب عليه وبسهولة ..

بدأنا جري , جرينا كتير وفجأة انعدمت الرؤية عندي , وشعرت إن دماغي خفيفة جداً , وحسيت بدوار رهيب وإن قلبي هيقف , وسقطت علي الأرض , صديقي خاف وكلم الاسعاف ..

تاني يوم صحيت وانا حاسس ان جسدي مر من فوقه عربة " محملة بطاطس باين 😂😂😂" وتخليت عن كل فكرة عندي إني أجري تاني أو أكون رياضي ..

.

هي دي حياتنا بالضبط ياجماعة

- كونك صحيت في يوم وعندك قناعة إنك تقدر تكون لاعب كورة كبير وقررت تبدأ اليوم ده فعلاً في خطواتك نحو النجومية بس للأسف مقدرتش تعمل ده في يوم وفقدت كل أمل في إنك تكون ما تريد ..

- في بداية السنة لما قررت تخلص السنة دي حوالي 50 كتاب في مختلف المجالات وتاخد الـ IELTS وتشوف منحة تقدم فيها وتوفي متطلباتها , وتقرأ في الفلسفة وتجيب تقدير كويس في كليتك , وتواظب علي الصلاة والطاعة .. ده عمره ماهيحصل بالـ  Spark of motivation اللي جيتلك في ساعة دي ..

- كل يوم قرارك اللي بتاخده وانت كلك حماس وطاقة إنك تكون إنسان جديد ومش بتتغير وكل يوم بتأجل وبتسوف علي أمل إنك تبدأ بكرة وعلي امل إن لسة وقت كتير اووووي وتقدر تعمل أي حاجة وقت ماتحب وبسهولة ..

- بداية رمضان لما قررت إنك تختم القرأن 3 مرات ومتسبش التراويح ولا الذكر وتكون شخص مطيع ومواظب علي الطاعة , الطاقة والحماس اللي جيتلك أول يوم دي للأسف مش هتخليك تكمل للأخر ..

- لما صحيت وقررت تروح الجيم وتعمل جسم وكلك حماس , وبعد أول يوم ملقتش نتيجة قررت تبطل جيم

...........................

اللي بيحصلنا ده  Just a spark of motivation  ومش هيخرجك من هنا صدقني

اللي بيملك صحة جيدة وجسم كويس , ده يستحقها , لأن ده نتيجة تمرين وتدريب يومي وجهد هو داوم عليه لفترة ..

اللي داوم علي المذاكرة وجاب تقدير كويس وحصل علي منحة محترمة في دولة كويسة , ده يستحقها والله , لأنه اقتنع إن مفيش Shortcut  في الحياة دي , كل شئ عاوز مجهود وتعب وسهر علشان يوصله .. وفعلا عمل كدة ووصل

الأهم من الإجتهاد ياجماعة هي " الدوام " علي الشئ القليل اللي بتعمله في يومك ..

اللي بتعمله وانت فاكر انك مبتعملش حاجة لو داومت عليه هتحس بقيمته فعلاً بعد فترة , السيدة عائشة قالت إن النبي كان دائم القول " أنَّ أَحَبَّ الْأَعْمَالِ إِلَى اللَّهِ أَدْوَمُهَا وَإِنْ قَلَّ "

.

كلنا عاوزين نسافر برة ونكمل تعليم في جامعة محترمة , ولكن هل حد فينا فعلاً عمل اللي عليه علشان يوصل للمكان ده ؟ هل وفيت كل اللي مطلوب منك ؟

طب ليه بنزعل لما بنفشل ؟؟؟

في حكمة جميلة أوي بحبها بتقول :

It's not rocket science . our destiny is surprisingly related to our daily habits. not sparks of motivation ..

موفقين

لا حدود للامل فلا يأس مع الحياة و لا حياة مع اليأس

أثناء فترة تدريب السير " أليكس فيرجسون " لمانشيستر يونايتيد في 2001 مانشيستر كانت خسرانة من توتنهام 3-0 في الشوط الأول .. السير أليكس بيقول " في الإستراحة بين الشوطين مكنتش عارف أعمل إيه , هدوء وصمت رهيب في غرفة الملابس , قولت ليهم خلينا نحرز هدف واحد ونشوف إيه اللي هيحصل بعدها ؟

مكنتش قادر أديهم تحفيز وأقولهم هما 45 دقيقة بس اللي هتلعبوها ولازم تحرزوا 4 أهداف لأن ده هيكون واضح انه مستحيل للبعض منهم , الفكرة كلها في إحراز هدف وال 4 هتكون معقولة إننا نحرزها , وفي النهاية فزنا 5 مقابل 3 ... "

دي أهداف الماتش : https://bit.ly/2LUFvFC

.

مش في كل الأوقات التحفيز بيجيب نتيجة , التحفيز ممكن يكون سبب للإطمئنان , مطمن إنك تقدر تخسر مثلا 15 كيلو في شهر , إنك تقدر تألف كتاب , إنك تقدر تذاكر لمدة 4 سنين في كليتك بدون مايصيبك ملل . كل ده مش صحيح .. د

.

متعودش نفسك علي " التحفيز " دوماً , لأن ده مستحيل , لو غاب التحفيز ده في أي وقت من الأوقات إنت هتضيع . عود نفسك علي المرونة , المرونة معناها إنك تبدأ في عمل أي شئ وبعد كدة هتلاقي الأمور وضحت والعمل ده قابل للتحقيق فعلاً .

في يوم قرر والد " ويل سميث" انه يهد الجدار اللي قدام المخبز بتاعه ويبني جدار جديد ، كان ويل لسة صغير واخوه كذلك وابوهم وكل ليهم مهمة انهاء الجدار ده . قاله مستحيل انا واخويا نعرف نبني جدار بالحجم ده ! ومع ذلك بدأ في بناء الجدار ، كان كل يوم يأتي من المدرسة كان يبشتغل في الجدار هو واخوه كان بيعمل فيه حاجات بسيطة جدااا بس كان بيشتغل .

الجدار بدأ يكبر تدريجيا ،بعد سنة ونص وقف الثلاثة قدام جدار مكتمل الأركان بالضبط زي ماخططوا لبناءه ، وبص والد ويل ليه وقاله : now, don't you ever tell me you can't do something again...

ويل قال انا اتعلمت حاجة مهمة جدااا من الموقف ده

" متقولش انا مش هعرف أبني الجدار ولا انا هبني أسوأ جدار تم بناءه في العالم ،قل لنفسك انا هضع حجر فوق أخر بمثالية كما يكون البناء ، لو استمريت علي ده كل يوم في النهاية هتلاقي عندك جدار مكتمل الأركان "

الدوام علي فعل شئ ولو بسيط هيعرفك علي مدي الأيام أد إيه الصفحة اللي كنت بتقرأها كل يوم من مرجع ما كانت مهمة جداً . أنا بحب أحط التأثير ده تحت مسمي " تأثير جناح الفراشة butterfly effect أو sensitivity to initial conditions "

التراكمية ياجماعة

.

متحاولش تحط هدف وتطارده , حط هدف وانساه ,

وإستمتع بخطوات وصولك للهدف ده , لأنك مش هتقدر مهما حصل تتوقع هل إنت قادر علي الوصول ولا لأ ؟ وكل مرة هتفكر في إمكانية فشلك هتصاب بإحباط وهتبقي عاوز تلجأ لأي حاجة " تحفزك " ورجعت تاني لنفس المشكلة ..

أتمني تكونوا فهمتوني

كفاية سوشيال ميديا مجتمعاتنا تنهاااار !!

السوشال ميديا بوظت كل علاقتنا والله ياجماعة ، خليتنا نعتقد ان ده هو الصح والعالم الصحيح المثالي للعيش .

خليتنا في المناسبات ندعي بعض في رسالة وارد عليك بتهنئة في رسالة . كانوا ايام زمان بيلفوا علي بعض في البيوت بيدعوا بعض .

بقينا حتي نستكتر نكلم بعض فون .

خليتنا نطمن علي بعض في الرسايل .. "إنت عامل إيه ؟ الحمد لله كويس . وانت ؟ " وماتت الرسالة كدة ، كان مفيش حاجة اسمها صلة رحم وزيارات منزلية وود وحاجات جميلة جدا .

خليتنا نواسي وننعي أحبائنا هنا ونعزي غيرنا هنا بمجرد رسالة . بقينا بنطمن علي تعب بعض هنا ونقضي حاجة بعض هنا . ونتقابل هنا  .

موتت العلاقات .

موتت كل حاجة جميلة في تجمع أصدقاء يوم الخميس مثلا لما بيخرجوا فيه ، في تجمع عيلة كل يوم أجازة من الاسبوع ....

السوشال ميديا مش بديل للعالم الخارجي ، ولا عمرها هتكون بديل . اخرج واختبر أرائك وأفكارك برة . اختبر أفعالك وشوف ردود افعال الناس ..

بقينا شئ سئ جدا والله

" العلوم إما فيزياء , وإما جمع طوابع " ernest rutherford

النهاردة ذكري ميلاد إرنست رذرفورد " 30 أغسطس 1871 "

الراجل اللي قال " العلوم إما فيزياء , وإما جمع طوابع "

وأخد نوبل في الكيمياء =D =D =D

.

بداية عمله كانت مع ج.ج. تومسون وكان علي تأثير أشعة إكس علي الغازات , وأدي عمله مع طومسون الي اكتشاف الإلكترون , اللي قدمه طومسون للعالم عام 1897 .

بعد كدة سمع إن هنري بيكريل شغال علي اليوانيوم , فقد يدرس إشعاع ذرة اليوانيوم إلي ان إكتشف نوعين من الإشعاع تختلف عن أشعة X .

بعد كدة راح كندا كمل شغل هناك ونجح في اكتشاف أشعة ألفا α وأشعة بيتا β سنة 1899 ليقدم للعالم نوعين مختلفين من الأشعة .

.

من 1900 إلي 1903 إشتغل مع كيميائي إسمه فردريك سودي علي عنصر الثيريوم Thorium وكيفية تحلله وإعطاءه عنصر جديد بعد التحلل ودرسوا فترة نصف العمر , وقالوا إن العنصر الجديد الناتج هو نوع من الغازات الخاملة وسموه Thoron .

.

سنة 1902 نجح هو وسودي في صياغة نظرية التحلل الذري Theory of Atomic Disintegration وقالوا إن الإشعاع عبارة عن ظاهرة تحلل تلقائية للذرات , لينتج عن ذلك نوع جديد من الذرات مختلف عن الذرة الأصلية والعنصر الأصلي " اللي هي النظائر Isotops " .

.

سنة 1900 في عالم إسمه بول فيلارد قال إن فيه نوع تالث غير ألفا وبيتا , فقام رذرفورد شغال علي الإشعاع ده سنة 1903 وقال إن فيه إشعاع ثالث يختلف عن ألفا وبيتا بسبب إمتلاكه قوة إختراق penetrating power أكبر من منهما , وأطلق عليه إسم جاما γ.

.

كمل شغله علي جسيمات ألفا مع العالم هانز غايغر وقدروا يكتشفوا كبريتيد الزنك ذو اللون الفوسفوي علي يقدروا يحددوا عدد جسيمات ألفا , بإستخدام كبريتيد الزنك علي شاشة تضوء scintillation screens .

.

سنة 1907 إشتغل مع العالم Thomas Royds وقدروا يخلوا جسيمات ألفا تخترق شباك رفيع جدا في أبوبة مفرغة , وظهر عن ذلك طيف من غاز الهيليوم وأثبتوا بذلك إن جسيمات الألفا بتأين ذرات الهيليوم .

.

اخر حاجة

طبعاً كلنا عارفين تجربته الشهيرة " تجربة رقاقة الذهب " اللي قدر يحط فيها نموذج ذري صحيح يختلف عن نموذج طومسون الخاطئ , وقدر يحدد مكونات الذرة .

ــ في عنصر إكتشفه رذرفورد تم تسميته بإسمه" Rutherfordium "Rf واللي كان المفروض يبقي إسمه Kurchatovium .

ــ في وحدة قياس إشعاع بإسمه وهي Rutherford وبتساوي 1 ميجا بيكريل .

" أصبر وأخلق لنفسك ظروف تلائم عقلك وفكرك و تعلم ممن سبقوك"

ألبرت أينشتاين عاش أصعب فترة في حياتة من سنة 1901 وإلي بدأ انتشار النسبية الخاصة ممكن نقول 1906 ..

سنة 1903 تزوج من زوجته الأولي ميليفا وفي 1904 رزق بأول طفل له وهو " هانز " ...

نشر في صحيفة محلية إعلان " دروساً خاصة في الرياضيات والفيزياء " ومحدش استجاب للإعلان إلا طالب فلسفة يهودي , وجد أينشتاين فيه بغيته بحيث انه كان بيناقش معاه أفكاره الجديدة وبيعرضها عليه ..

كان عنده صديق إسمه " ديفيد رايخنشتاين " بيقول عن زيارته لألبرت في البيت :

" كان باب المنزل مفتوح كي يسمح للأرضية التي مسحت للتو , والثياب المعلقة في الردهة بأن تجف . وحين دخلت غرفة أينشتاين وجدته يجلس في جانب الغرفة يهز مهد الطفل بيد , وفي اليد الاخري يمسك كتاب مفتوع , وفي فمه سيجار من نوع ردئ جداُ , ومن الموقد كان ينبعث دخان كريه "

.

الصعوبات اللي بتقابلك في حياتك ماهي إلا إعادة تشكيل لشخصيتك , بتديك دافع إنك تكمل وتعافر علشان تبقي أفضل من اللي انت فيه ..

مفيش حد بيحقق حلمه بسهولة ياجماعة , لازم تتعب , تتعثر , تقف , تكمل , وتقع , ثم تقف مرة أخري لتكمل بقوة أكبر من الأولي ...

إوعي في يوم تلعن ظروفك وتتذمر من حالتك وتركن فشلك علي كلمة " الظروف مش مساعداني " وصدقني مش هتساعدك ..

أي حاجة بنعملها محتاجة صبر , صبر علي كل خطوة قررت تاخدها . لمجرد إنك قررت تاخد الخطوة دي يبقي انت عاوزها فابالتالي لازم تصبر ...

" أصبر وأخلق لنفسك ظروف تلائم عقلك وفكرك "

لا تيأس و لا تحبط لا حدود للطموح

واحد هندي بيحكي قصته إنه أول ماالتحق ب  Indian Institutes of Technology

وأول يوم ليه في الجامعة قابل خريج قاله " متحاولش تجيب درجات عالية , لو عملت كدة مش هتلاقي وطيفة , خليك دايماً في المتوسط وممكن تلاقي وظيفة وإتنين "

بيقول في الوقت ده كان واحد من أوئل الجامعة بيملي إزازة المية بتاعته جنبنا , الراجل الخريج ده شاولي عليه وقالي " بص الشخص ده ؟ من أعلي الناس في مجاله , ولكن مش لاقي وظيفة "

بيقول الشخص المتفوق ده سمعنا ولكن في هدوء أخد إزازة المية ومشي لغرفته .

.

بيقول عملت زي ماقالي الشخص ده , كنت دايماً في المتوسط ودرجاتي مكنتش عجباني ومع ذلك إستمريت في إني أجيب درجات متوسطة . إلي أن حدثت " أحداث سبتمبر 9/11" في الوقت ده كل الخريجين فجأة جالهم إيميلات رفض من معظم الشركات اللي وعدتهم بشغل بعد التخرج .

في وسط الزحام والهيصة التعجبات اللي كانت علي وجوههم كان في شخص هادي جداً وقاعد بدون أي كلام , هو الشخص اللي كان دايماً بيطلع الأول .

.

جالي وسط الزحام وقالي عاوز من وقتك 10 دقايق بس , أنا استغربت إحنا متكلمناش قبل كدة خالص , وافقت ومشيت معاه وقدنا وبدأ الكلام

قالي خد إقرأ الإيميل ده كدة , لقيت مكتوب الأتي "  “Massachusetts Institute of Technology”. Congratulations! You are accepted for a PhD program. "

وقالي الكلمات دي اللي عمري ماهنساها :

" حاول ان تحصل علي درجات اللي بيها تعتز بنفسك مدي حياتك , متاخدش نصايح من حد , كلهم عاوزينك تبقي متوسط ولكن انا متأكد انك ممكن تعمل أحسن من كدة , من دلوقتي اقضي ساعات اضافية في المكتبة . السبب اللي بيخليني أقولك كدة هو إنك مش عارف ايه اللي ممكن يحصل في يوم وليلة .ممكن ياخدوا منك كل حاجة إلا حاجة واحدة هو مجهودك اللي بذلته وتعبك "

صاحب الإجابة بيحضر دكتوراة في جامعة واسكنسون ماديسون في الهندسة الكيميائية , وحالياً شغال مهندس جودة في Amazon.

......

أيوة حاول تجيب تقدير علي أد ماتقدر , سيبك من اللي بيقولك إن التقدير ملوش لازمة , لو قولت كدة يوماً ما فأنا بجد أسف جداً لأني كنت غلطان .

للأسف أنا معرفتش أجيب تقدير" جايب جيد 72%" لأني مكنتش بعرف أحفظ عندي مشكلة رهيبة , قلة تقديري وقفت حائل بيني وبين فرص كتير .. بس أنا والله حاولت

دي نصيحة للي لسة داخلين الجامعة , موت نفسك وهات تقدير , وساعد زمايلك وشجعهم .

ربنا يوفقنا جميعاً للصالح

كن نفسك be yourself لتحيا حياتك

أنا اتعودت مبصش لحد ولا أقارن أوضاعي المادية ولا العلمية ولا أي حاجة بأوضاع أي شخص لأن ده هيجيبلي إكتئاب ويحولني لنسخ من كل شخص عاوز أبقي زيه ..

يعني متقولش " فلان " عنده علم أكتر مني وبيتكلم حلو في الفيزياء يبقي لازم أقوله يجيبلي كتب وأتكلم أنا كمان في الفيزياء وأبقي مشهور .. ولا فلان معاه فلوس اكتر مني واتمرد علي أهلي وعلي عيشتي ...

كل شوية هتشوف واحد بيعمل حاجة كويسة وهادفة وهو مستمتع وبيلاقي إعجاب الناس وإستحسانهم هتبقي عاوز تعمل زيه , علشان الناس تحبك زيه ..

لكن هل إنت كدة فعلاً ؟؟

كل واحد فيه " حاجة خاصة " لازم يبحث عنها وينميها , ممكن تكون كويس في العلم يبقي إقرأ وخد كورسات واوصل لمكان محترم إتعلم فيه ..

ممكن تكون كويس في الإدارة وتبقي رئيس شركة ناجح ...

متحاولش تقلد حد لأنك هتتحول لكائن مريض مكتئب قاعد يحقد علي الناس والكره هيزيد في قلبك جداااااا لكل شخص ناجح ...

.

حاجة مهمة أخيرة ..

الحياة دي ياصديقي زي السباق كلنا بنجري فيها لخط نهاية واحد مع أهداف مختلفة والبعض متشابه , هتلاقي اللي بيجري جنبك  برجل واحدة وبيعافر وعاوز يوصل للنهاية , وهتلاقي اللي بيجري مثلاً " بعكاز " برضة وعاوز يوصل ..

وهتلاقي اللي بيجري جنبك بعربية هي ظروفه كدة وهيوصل قبلك عادي

الناس اللي بتحلكم عليكم من برة ليس عندهم شفقة علي أي شخص في السباق مش هيقول ده بعربية والتاني ماشي يبقي إديله امتيازات ..

لو انت بصيت للي راكب عربية وقولت " انا مالي  كدة مفيش عدل أنا منسحب " هيقولولك في داهية ... نظرتهم واحدة للجميع مفيش حاجة اسمها ظروف

.

اشغل نفسك بنفسك وسيب الناس في حالها وتمني الخير للجميع , وارسم طريقك كويس قبل ماتاخد قرار وتتحمل تبعيات اختيارك ياعزيزي ..

اتعلم تحط لنفسك هدف و عيش عشانه هيعرفك معني الحياة

كونك عندك هدف بتسعي ليه وعاوز تحققه ده في حد ذاته حاجة عظيمة ، أيا كان الهدف حتي لو كان الهدف ده مثلا واحدة عاوز تتجوزها فهو برضة هدف بتسعي ليه وعاوز تحققه ..

انك تنام علي سريرك وعندك حاجة هتصحي تاني يوم عليها دي حياة لوحدها ..انك تخطط وترسم وتنفذ وتفشل مرة واتنين وتوصل الأخر هتحس اد ايه انك كنت مميز عن غيرك لما سعيت وجريت ورا حاجة انت عاوزها .

خلي عندك هدف يومي ، هدف اسبوعي ، او علي المدي البعيد بالنسبة لمستقبلك

مفيش هدف تافه ،البنت مثلا لو خططت كل يوم تتعلم طبخة معينة ده اسمه هدف ولو حققت ده هتحس بسعادة برهيبة لانها وصلت للي هي عاوزاه ..

انك تخطط تذاكر مادة وتخلصها ، انك تخطط تجري شوية وتعمل كدة ، كل دي حاجات هتسبب ليكم السعادة

الهدف ياجماعة حياة لوحده صدقوني

فكر في هدف وانت عاوز تبقي ايه او توصل لإيه وخطط كويس واسعي لتحقيقه وافشل مرة واتنين وهتوصل متقلقش

ساعد غيرك في طريقك وخد بإيده وافرح بنجاحه وتقدمه ..

ارجوكم محدش يسيب حياته رهن الصدفة ، متسيبش الظروف تخطط ليك مستقبلك وتفرض عليك حاجات انت مش عاوزها ،هتبقي حياتك جحيم لانك بتعمل حاجات بتسد بيها ثغرات اتفتحت عليك انت مش حاببها ولابتستمتع بيها .

استمتع بمزاجك قبل ما الحاجة تتفرض عليك وتندم.

حبوا بعض ياجماعة وساعدوا بعض

امك ثم امك ثم امك حتى اخر يوم في عمرك

حتي الامر كان كدة بالنسبة للعلماء ، كانت الام ليها دور عظيم في حياتهم ، في نشأتهم وحبهم للعلم ودفعهم للأمام .

توماس أديسون قال في كتب من سلسلة عباقرة العلماء " لقد صنعتني أمي, لأنها كانت تحترمني ،و تثق بي أشعرتني أني أهم شخص في الوجود, فأصبح وجودي ضروريا من أجلها ،و عاهدت نفسي أن لا أخذلها كما لم تخذلني قط !! "

كل شئ هتعمله من مساعدتك للناس هتلاقيه والله ، انا والله ماسألت الله شئ الا وأعطاني إياه ، أيا كان الشئ ده فربنا بيعطيني إياه . حتي لو وقعت في مشكلة او عاوز اخلص ورق بلاقي اللي يعرض المساعدة من غير مااطلبها ،

اللي عاوز أقوله

رفقا بوالديكم فهما من يعطيان معني لحياتك ❤❤

ساعد الناس واوعي تستني مقابل حتي لو شكر ، ساعد لوجه الله ، كل ماتعطيه فهو رد ❤❤

صدقني حاجة مش كويسة انك تعلي صوتك علي والدتك او والدك او حتي تدقق فيهم النظر .دا كنز مش هتحس بقيمته الا لما يروح منك . ارضيهم بكل ماتملك بنفسك ،بوقتك ،بمالك ،بكل حاجة .

ادعي انك تكون ابن او بنت بارة وترد جزء من اللي هما عملوه ليك..

يخرج من الجافي حلاوة

في سؤال علي Quora بيقول " هل حدث وفشل شخص في MIt  "

ردت بنت بـ " فشلي في MIT  كان أعظم ماحدث لي في حياتي " وقالت قصتها

كان الترم الأول لي في MIt  رائع , لدرجة إني جبت +A  في كل المواد . الترم التاني كان كويس ولكن جبت في الكيمياء العضوية B  .

مكنش عندي أدني فكرة عن " أنا عاوزة أكون إيه ؟ " لم أكن أملك أي حلم ولا أي هدف في حياتي . كان والداي عاوزيني أكون دكتورة زيهم .

في الترم الثالث ليا جبت D  في الجبر الخطي وكل المواد كذلك , دخلت في حالة فتور وبدأت اقلل حضور للمحاضرات وألغي كل حاجة , بدأت ازيد في وقت نومي وكان عندي اعتقاد دائم ان ك اصدقائي افضل مني .

في الترم الرابع ليا جبت F في مادتين وأخدت تحذير ..

.

في الترم الخامس ليا توقفت نهائي عن الحضور ولم أعد أغادر سريري سوي لحضور صف الرقص والغداء مع زملائي ودايماً كنت اتظاهر بأن كل شئ بخير . وبعدها كالعادة أغادر لسريري .

كذيت علي الجميع , علي نفسي , علي أصدقائي , علي والداي اللي كانوا بيعتقدوا ان انا بجيب A  كل ترم كالعادة . كنت خايفة انهم يقولوا عليا فاشلة ومش اد المسؤلية .

.

 أخيراً قررت ترك MIT  وقررت أعرف والداي اني فشلت , أخبرت والدي وطلب يشوف درجاتي , أرسلتها إليه ودخلت غرفتي وانتظرت جالسة وراء سريري , منتظرة الاسوأ .

دخل والدي عليا وأجلسني وبكي , فقط بكي :( :( .

تاني يوم أخدني ووالدتي لمدرسة الفنون وتوسلوا موظف القبول لحد ماتم قبولي , كنت مصابة بإحباط رهيب إني فاشلة جداً ولم تسر الأمور بخير , لدرجة انهم حذروني ان الترم ده أخر فرصة ليا والا هيتم طردي .

.

قررت حضور " صف البيولوجي " بجانب الدراسة في مدرسة الفنون , قسمت وقتي بين البحث العلمي في البيولوجي وبين الدراسة . كنت أقضي 36 ساعة اسبوعيا في البحث العلمي , الموضوع كان مرهق ولكن كنت سعيدة جداً .

أخيراً إكتشفت اللي انا عاوزاه , أريد أن أكون عالمة . أخيراً إمتلكت هدف , اكتشفت ان الانسان مش مجرد درجات , فشلي في MIT  كان افضل ماحدث لي .

اتخرجت بعد 5 سنوات بدرجة امتياز مع مرتبة الشرف , حالياً أدرس الدكتوراة في " علم الأعصاب "

.

كن ممتن لفشلك ..

ابحث عن ذاتك بشويش خالص وبهدوء وإيال تكون نسخة مكررة من شخص . أكيد ربنا عز وجل أعطاك نعمة لم يعطها لغيرك إبحث عنها وشوف موهبتك وشغفك فين ونميه وارضي شغفك دوماً , واياك تخاف من كلام الناس .

انت مش فاشل , انت اتحطيت في ظروف غلط :)

لا تؤجل عمل اليوم الى الغد

في الحقيقة كلنا عارفين احنا عاوزين ايه كويس أوووي ,

 وعارفين إيه اللي ورانا ولازم نخلصه ,

 وعارفين عواقب التسويف كويس أوووي , 

وعارفين ومدركين سرعة الوقت الرهيبة , 

وفاكرين نفسنا أول السنة لما حطينا ليست طووويل نعمله ومعملناش أي حاجة منه بإعتبار ان السنة طويلة وأهي خلصت :) :) .

كلنا بيفضل المكافآت السريعة , الشعور الوقتي باللذة , هل أذاكر للأيلتس اللي همتحنه في شهر 3 ولا أتفرج علي فيلم دلوقتي وخلاص ؟ هتختار الفيلم بإعتبار ان شهر 3 لسة عليه بدرررري , 

المذاكرة , القراءة , الـSaved posts و الـ bookmarks اللي انت مأجلهم لوقت الفراغ , هل فعلاً يومك مفيش فيه ولا أي وقت فراغ ؟ طب الفيلم اللي انت لسة منزله هتسهر عليه إيه نظامه !! 

مع اننا عارفين برضة اننا لو خلصنا إلتزماتنا دي كلها هنرتاح نفسياً , بتنام كل يوم وتبص للسقف وتوعد نفسك انك هتكون انسان جديد في الصباح الباكر , ومع كباية الشاي الصباحية تطير كل الأفكار والوعود بتاع امبارح 

المشكلة التانية هي إننا مثاليين جداااا , كونك منتظر انك تكون فااااضي خااالص علشان تبدأ تذاكر , أو تقرأ صدقني مش هتكون فاضي لأن الفراغ أو الفضي بالمفهوم بتاعك مش موجود ياصديقي .. لذلك اخلق وقت بقي 

ساعتين في اليوم مذاكرة علي الدوام كفيلة تخليك إنسان تاااني خااالص والله ,, النص ساعة قراءة في اليوم اللي انت مش عاوز تعملها لأنها مش كفاية حلوووة أوووي , هل انت جربتها , كل الحكاية انك شايفها مش كفاية !! ليه ؟؟ 

جلد الذات برضة من أكبر المشاكل اللي ممكن تقابلك , تضخيم المشكلة أو الذنب أو التقصير والمبالغة مش حاجة كويسة .. 

اليوم فات من غير مذاكرة وقراءة , خلاص كبر دماااغك هو فات وخلاص , بلاش تقعد تقول :" أنا فاشل , أنا معملتش حااجة النهاردة مش هوصل , انا خسارة فيا الأكل , هضرب نفسي حقنة هوا في ال،&$#* " عادي ياعم خلاص .. 

المشكلة انك بعد جلد الذات ده , بتعدم نفسك بالمثالية , بتحط مليون حاااجة تعملها اليوم التالي , ومبتعملهاش كلها وتبدأ تجلد نفسك تاااني , وهكذا بقي كل يوم .. 

إحنا محتاجين حد يمسكنا من رموشنا ويقولناا فووووقوااا ياااجدعاااان 😂 😂 😂  فوقوا وبطلوا تسويف , ومثالية , وجلد نفس .. 

إحنا مدركين بس مغيبين 

مساء الفل

الجرجير Arugula يقضي علي فيرس سي

الجرجير Arugula يقضي علي فيرس سي

.

أكد مجموعة من الباحثين في جامعة هارفرد أن الجرجير يشفي نهائياً من فيرس سي , وقال الدكتور ستيفن مارك Steven Mark رئيس المجموعة " لقد وجدنا أن الجرجير له قدرة عجيبة علي القضاء علي فيرس سي , وقد تأكدنا من ذلك علي بعض الحالات التي اختبرناها قبل وبعد العلاج بالجرجير "

وفي إحدي كلماته علي منصة TED قال دكتور ألبرت هوفمان Albert Hofman  أنا أؤمن الأن بمقولة المصريين الرائعة  " لو عرفت الست أهمية الجرجير , كانت زرعته لجوزها تحت السرير " 😂😂

.

الكلام حلو صح ؟! بس كله غلط وأنا نصاب أقسم بالله ومحصلش منه حاجة 😂 😂😂😂

في دراسة في 2008 نشرت في دورية Journal of Cognitive Neuroscience أشارت أن الناس سوف يصدقون التفسيرات الزائفة بسهولة اذا اقترنت هذه التفسيرات ببعض الكلمات التقنية والمعلومات المزخرفة .

زي مثلاً إما أقولك :

" تشير العينات التي أخدناها من كبد المرضي المصابين الذين تم شفائهم ان الفيروس تم القضاء عليه بسبب مادة الـ Nematode

التي لها القدرة علي مهاجمة DNA  الخاص بالفيروس "

كدة انت لازم تصدق , لأني زنقتك خلاص 😂😂😂😂

.

ده بالضبط اللي بيحصل ياجماعة في أي معلومة غلط بنشوفها , في أي حاجة عاوزين ننسوق ليها وهي غلط , في أي حاجة لجريدة " المصري اليوم " والهبل اللي بتسوق ليه تحت مسمي علم ..

الحاجات اللي بينشرها " كفتجية مواقع التواصل " طول اليوم ويقرفونا ويخلوا الواحد يقعد يبحث طول النهار علشان بس يتأكد من صحة القرف اللي اتنشر .

إضفاء نزعة فلسفية علي الأمور وهتبقي الدنيا زي الفل , 20% فقط من إجمالي القارئيين لتلك المقالات يطلبون المصادر والمراجع الخاصة بالموضوع .

.

إذا أردت أن يصدقك الناس , فلتضفي نزعة فلسفية علي موضوعك

جميل انك تفهم حالتك او انت بيحصلك كدة لييه وتبدأ تعالج نفسك رويداً رويداً

السؤال اللي دايماً كنت بسأله لنفسي ليه مخرج أي عمل مضحك زي " راجل وست ستات او friends" مصمم يحط صوت ناس بتضحك علي الرغم اننا مبنحبوش ؟ وكنت بحتار بجد .

ذكر عالم النفس تشالديني قصة واحدة اسمها " كاثرين جينوفيز" وهي سيدة تم قتلها في احدي شوارع مدينة نيويورك سنة 1964 بيقول علي الرغم مم ان القاتل هاجمها 3 مرات طول نص ساعة كاملة وهي بتصرخ وبتستغيث بالناس وعلي الرغم ان كان فيه حوالي 38 شخص في المكان الا انه لم يتحرك أي شخص لإنقاذها .

وفسر ده بما يسمي " الدليل الاجتماعي social proof" بمعني ان الناس محتاجين يشوفوا غيرهم بسعمل الحاجة علشان يرتاحوا ويعملوها هما كمان ..

بمعني ان كل واحد من اللي واقفين مستني التاني يتحرك علشان يتحرك هو كمان وينقذ الست دي .

حتي في الانتحار ، سنة 1978 انتحر حوالي 910 شخص من طائفة اتباع معبد الشعب في مدينة جونزتاون في أمريكا ، الواقعة دي مشهورة وممكن يتخللها تأثير ديني ولكن مع أول شخص شرب السم دفع الباقي لشربه .

في التسويق بيستخدم الدليل الاجتماعي للاقناع ، 99.999999999 ينصحون بمعجون أسنان ام حسن .

بنصح كل الأمهات بصابونة خد في ايدك وما الي ذلك بقي 😂😂😂😂

وبيحصل معاك شخصياً في مواقف

الراجل بتاع كبدة الكلاب اللي علي اول الشارع اللي بيقف عليه نص مليون واحد ويخليك تقول يعني هي جيت عليا اما اشتري منه ..😂😂

في المحاضرة بتخاف تسأل وتستني حد يقوم يسأل علشان تعمل زيه وتسأل الدكتور انت كمان .

في المذاكرة لو لقيت الناس كلها مبتذاكرش انت كمان مبتذاكرش وبيبقي عندك راحة نفسية وطمأنينة جميلة اوووي لحد ماتلبس ..

جميل انك تفهم حالتك او انت بيحصلك كدة لييه وتبدأ تعالج نفسك رويداً رويداً

فإشطة يعني