بتنسي بسرعة .....النسيان المؤقت اسبابه و علاجه

هو أنا كنت داخل الأوضة أجيب إيه ؟

.

فجأة وانت قاعد في أمان الله تفتكر إنك نسيت مذكرة في الأوضة , تقوم علشان تجيبها واول ماتوصل الأوضة وتدخل تنسي إنت كنت جاي ليه , وممكن ترجع تاني من غير ماتجيب الحاجة اللي انت عاوزها !!

برضة  زيها زي إما أمك تبعتك تجيب طلبات من السوبر ماركت وتنسي وانت هناك أول ماتوصل وتتصل تقولها أنتي كنتي عاوزة ايه ؟ 😂

وتقعد تقولك ايوة ما انت بتحب بقي علشان كدة بتنسي

للأسف ده مش حب ..

.

الحالة دي إسمها " Doorway Effect  " ومتخفش مهوش زهايمر ولا حاجة وحشة , دي بتدل إن عقلك لسة كويس كمان ..

في دراسة اتعملت في 2011 وجدوا ان " Doorway Effect " نتيجة لمجموعة من البرامج العقلية شغالة تلقائياً .

جابوا 55 طالب جامعي وخلوهم يلعبوا لعبة علي الكمبيوتر  الTask  بتاعها انه يدخل أوضه ويجيب صندوق في حاجة معينة , وأول مايدخل الأوضة يشوف الصندوق فيه ايه , وبعد مايخرج الكمبيوتر بيسأله " هل الحاجة اللي في الصندوق هي كذا ؟؟ "

بعدها عملوا التجربة في الواقع وسمحوا ليهم يشوفوا الصندوق مرة واحدة بس أول مايدخل الاوضة .. وكان بعد مايخرج بفترة من الأوضة بيسألوه " هل الصندوق ده فيه كذا ؟ "

ونتائج التجربتين كانت واحدة ..

.

معظم اللي عدي عتبة الغرفة ودخل في مكان ونظام جديد بيتطلب منه ذكريات وعمليات تذكر نسي إيه اللي كان في الصندوق , النظام الجديد ده fresh landscape for memory...

عتبة الغرفة تسمي ب  " Cut-off Point " أو نقطة انقلاب مثلاً من حاجة لحاجة تانية خالص .. 

والعملية محتاجة إنتباه بقدر كبير  , وللأسف العقل ميعرفش ينتبه لكذا حاجة في وقت واحد ..

.

ومفيش علاج للموضوع ولايمكن تجنبه , إلا لما وانت داخل تقعد تكرر " أنا داخل أجيب المذكرة . أنا داخل أجيب المذكرة " 😂😂

ايمان العالم الشهير نيوتن و اعترافه بوجود الله

لما نشر نيوتن كتابه Mathematical principle of natural philosophy وضع فيه قوانين الحركة , مع ظهور الكتاب وانتشاره نشأ عن ذلك أول مفارقة عن نشاة الكون وهي الـ Bentley's paradox ...
وعلي الرغم من الشهرة الواسعة اللي تلقاها نيوتن من نشر الكتاب _ بمساعدة هالي_ إلا انه كان عارف ان نظرية الجاذبية كانت مليئة بالمفارقات .
.
سنة 1692 أرسل الراجل Richard Bentley  خطاب إلي نيوتن قاله :
" لو الجاذبية دائماً قوة جاذبة زي ماانت بتقول , وليس هناك أي تنافر , فإن أي تجمع من النجوم هينهار علي نفسه . ولو الكون محدود كانت كل النجوم إلتحمت مع بعضها في نجم واحد كبير بسبب قوة الجاذبية .. ولو غير محدود هتكون القوة المؤثرة علي أي جسم تسحبه لليمين أو الشمال والقوة دي هتكون غير محدودة وهيتم تمزيق الجسم "
للوهلة الأولي لما تقرأ الكلام ده هتقول إن "بينتلي " وضع نيوتن في مأزق , وعمله حتة لامس اكتاف من بتوع ممدوح فرج 😂😂😂😂
.
وبعد تفكير عميق وتفضيله فكرة الكون الغير محدود أرسل الرد .
نيوتن فضل فكرة الكون اللانهائي اللي بيخضع لتماثل كلي .
يعني لو تم سحب نجم من مجموعة من النجوم علي يمينه , قوة السحب هتتلغي بسبب وجود نفس المجموعة من النجوم علي الشمال , وبالتالي النجم هيستقر
أو زي ماقال نيوتن " All forces are balanced in each direction "
ده لو القوة الجاذبية دايماً جاذبة يبقي حل المفارقة هو الإنتظام والكون الغير محدود
..
نيوتن مكنش أهبل ,لأنه عارف ان ده حل ضعيف وهو بنفسه قال كدة في خطابه
بتفسير ينوتن ده بيضع الكون " رهن الصدفة " يعني أي تغيير مفاجئ في قوة الجاذبية لنجم واحد , كل النجوم في الكون هتنهار علي بعضها , والكون ينهار
.
وهنا لجأ نيوتن لوجود "القوة الإلهية Divine Power " وهي القوة اللي بتمنع الكون
من الإنهيار , وكتب قائلاً " Continual miracle is needed to prevent the sun and the fixt stars from rushing together  through Gravity "
نيوتن شايف ان الكون عبارة عن ساعة عملاقة , شغلها الإله في بداية النشأة وهتفضل شغالة دون تدخل منه , لوجود القوانين الثلاثة للحركة .
.
نيوتن كان دايماً كدة ياجماعة , يحركه إيمانه في المعضلات , كان كل مرة لايستطيع فيها تفسير أي ظاهرة كان بينسبها للإله .

انقراض اخر وحيد قرن ابيض على وجه الارض

الأيام اللي فاتت عرفنا إن أخر ذكر من نوع " وحيد القرن الأبيض " مات وبكدة النوع انقرض نهائياً , فلم يعد هناك وحيد قرن أبيض لتريه لإبنك الصغير ويقذفه بالحجارة وأنت تلقمه إياهها في حديقة الحيوان :)
.
خليني هنا أكلمكم شوية عن أد إيه ظهور الإنسان كان مؤذي لبيئته وكل اللي حواليه من نباتات وطيور وحيوانات وأي ابن كلب ماشي علي الكوكب 😄😄

ـ في أخر 500 سنة إنقرض حوالي 322 نوع من الطيور والحيوانات ,وزواحف وبرمائيات , و حوالي 2/3 من انقراض ال 322 نوع حصل في ال200 سنة الاخيرة ..
في أخر 35 سنة زاد عدد البشر تقريباً الضعف ,بمعدل الزيادة ده في 2100 هنكون حوالي 27 مليار كئيب علي الكوكب .
.
إلي الأن تم إكتشاف حوالي 1.9 مليون نوع حيوان , وحوالي 450000 نوع نبات  , من كل مليون نوع بيختفي من 100 لـ 1000 نوع سنوياً , بالرجوع بالزمن لـ 200.000 سنة ورا يعني قبل ظهور البشر وجدوا إن من كل مليون نوع اختفي نوع سنوياً .. " شوف التعليقات "
.
ــ وفي إحصائية أخري قالوا إن عدد الانواع اللي انقرضت من ظهور الإنسان حوالي 477 نوع وده في اخر 100 سنة بس .
المشكلة ان محدش يقدر يحدد تحديد دقيق لعدد الإنقراضات لأننا منعرفش عدد الانوع كام علشان تقدر تعمل حصر وفي وكامل للي إختفي .

دا أكتر من نصف الأنواع الموجودة إلي الان هي " حشرات " بما في ذلك حوالي 35.000 نوع " خنافس " 😂😂 إنت متخيل ..
لدرجة لما سألوا عالم الوراثة البريطاني جي بي اس هالدين عما استنتجه عن الخالق من دراسته للطبيعة قال :
" إن كان موجوداً فهو مغرم بشدة بالخنافس . "
.
العلماء بدأوا يكلموا الحكومات بالإسلوب بتاعهم اللي هو " بالفلوس " فعملوا حصر:
ــ حوالي 73% من الزيارات لدولة ناميبيا بتعتمد علي الطبيعة , بتدخل حوالي 14.3% من إجمالي الدخل القومي للدولة .
ــ مشاهدة الحيتان في أمريكا اللاتينية بتجني حوالي 375 مليون دولار سنوياً
ــ مشاهدة القرش في الولايات المتحدة بتجني حوالي 314 مليون دولار سنوياً , اللي هو تقدر توفر وظائف ل 10.000 شخص عاطل .
.
أدي الإنسان المؤذي لنفسه وللطبيعة ولكل اللي حواليه , وشوية كمان وهنأذي الكواكب اللي جنبنا عالطلاق وهتبقي أيامنا رنجة 😄😄😄😂😂😂😂

حوار قصير عن الخيبة لا تجزع من رحمة الله

هو : مايبكيك ياصديقي

أنا : لا أدري مايبكيني ! هل أبكي علي ما أصابني من خيبة ، أم علي ما أخشي أن يصيبني من تلك الخيبة ؟

هو : وما الخيبة !؟

أنا : هو ذلك الشعور الذي يلازمك حينما لاتفعل شئ ! شعور دائم بأن كل ماتفعله ليس بشئ . يلازمك طيفا لاتري ملامحه وتتسائل أهذا أنا !؟

هو : حاول أن تتخلص من ذلك الاحساس

أنا : تقصد اللاشئ ! اللاشئ ليس بإحساس .هو مايلازمك حينما تمرض نفسك ،حينما تفقد الأمل ويأتي اليأس بمتاعه ليمكث بمنزلك قليلا ؛ يصاحبك ، يتودد إليك وقد تجد الألفة في مصادقته أحيانا . فهو صديق وفى والأجمل من ذلك أنه سيجعلك تشعر بالحنين لنفسك القديمة وحينما تدركها سيغادرك لتلملم ماتبقي من نفسك .

هو : ولماذا تبكي الأن ؟

أنا : لانه غادرني وضميري وأنا الأن لا أستطيع أن ألملم ماتبقي من نفسي ..

هو : لاتبك فذلك مايحل بالجميع في وقت ما ،لايفعلون شئ أو تموت تلك الرغبة في فعل أي شئ ، في خيبة من حين لأخر وذلك مايجعل للحياة معني ، فهو يذكرك بأن ماتريده يصعب نيله باللاشئ ..

وتلك سنة الطلب ..ماتريده تسعي إليه ..

فرفقا بنفسك وصادقها ..

.

" العلوم إما فيزياء , وإما جمع طوابع " ernest rutherford

النهاردة ذكري ميلاد إرنست رذرفورد " 30 أغسطس 1871 "

الراجل اللي قال " العلوم إما فيزياء , وإما جمع طوابع "

وأخد نوبل في الكيمياء =D =D =D

.

بداية عمله كانت مع ج.ج. تومسون وكان علي تأثير أشعة إكس علي الغازات , وأدي عمله مع طومسون الي اكتشاف الإلكترون , اللي قدمه طومسون للعالم عام 1897 .

بعد كدة سمع إن هنري بيكريل شغال علي اليوانيوم , فقد يدرس إشعاع ذرة اليوانيوم إلي ان إكتشف نوعين من الإشعاع تختلف عن أشعة X .

بعد كدة راح كندا كمل شغل هناك ونجح في اكتشاف أشعة ألفا α وأشعة بيتا β سنة 1899 ليقدم للعالم نوعين مختلفين من الأشعة .

.

من 1900 إلي 1903 إشتغل مع كيميائي إسمه فردريك سودي علي عنصر الثيريوم Thorium وكيفية تحلله وإعطاءه عنصر جديد بعد التحلل ودرسوا فترة نصف العمر , وقالوا إن العنصر الجديد الناتج هو نوع من الغازات الخاملة وسموه Thoron .

.

سنة 1902 نجح هو وسودي في صياغة نظرية التحلل الذري Theory of Atomic Disintegration وقالوا إن الإشعاع عبارة عن ظاهرة تحلل تلقائية للذرات , لينتج عن ذلك نوع جديد من الذرات مختلف عن الذرة الأصلية والعنصر الأصلي " اللي هي النظائر Isotops " .

.

سنة 1900 في عالم إسمه بول فيلارد قال إن فيه نوع تالث غير ألفا وبيتا , فقام رذرفورد شغال علي الإشعاع ده سنة 1903 وقال إن فيه إشعاع ثالث يختلف عن ألفا وبيتا بسبب إمتلاكه قوة إختراق penetrating power أكبر من منهما , وأطلق عليه إسم جاما γ.

.

كمل شغله علي جسيمات ألفا مع العالم هانز غايغر وقدروا يكتشفوا كبريتيد الزنك ذو اللون الفوسفوي علي يقدروا يحددوا عدد جسيمات ألفا , بإستخدام كبريتيد الزنك علي شاشة تضوء scintillation screens .

.

سنة 1907 إشتغل مع العالم Thomas Royds وقدروا يخلوا جسيمات ألفا تخترق شباك رفيع جدا في أبوبة مفرغة , وظهر عن ذلك طيف من غاز الهيليوم وأثبتوا بذلك إن جسيمات الألفا بتأين ذرات الهيليوم .

.

اخر حاجة

طبعاً كلنا عارفين تجربته الشهيرة " تجربة رقاقة الذهب " اللي قدر يحط فيها نموذج ذري صحيح يختلف عن نموذج طومسون الخاطئ , وقدر يحدد مكونات الذرة .

ــ في عنصر إكتشفه رذرفورد تم تسميته بإسمه" Rutherfordium "Rf واللي كان المفروض يبقي إسمه Kurchatovium .

ــ في وحدة قياس إشعاع بإسمه وهي Rutherford وبتساوي 1 ميجا بيكريل .

" أصبر وأخلق لنفسك ظروف تلائم عقلك وفكرك و تعلم ممن سبقوك"

ألبرت أينشتاين عاش أصعب فترة في حياتة من سنة 1901 وإلي بدأ انتشار النسبية الخاصة ممكن نقول 1906 ..

سنة 1903 تزوج من زوجته الأولي ميليفا وفي 1904 رزق بأول طفل له وهو " هانز " ...

نشر في صحيفة محلية إعلان " دروساً خاصة في الرياضيات والفيزياء " ومحدش استجاب للإعلان إلا طالب فلسفة يهودي , وجد أينشتاين فيه بغيته بحيث انه كان بيناقش معاه أفكاره الجديدة وبيعرضها عليه ..

كان عنده صديق إسمه " ديفيد رايخنشتاين " بيقول عن زيارته لألبرت في البيت :

" كان باب المنزل مفتوح كي يسمح للأرضية التي مسحت للتو , والثياب المعلقة في الردهة بأن تجف . وحين دخلت غرفة أينشتاين وجدته يجلس في جانب الغرفة يهز مهد الطفل بيد , وفي اليد الاخري يمسك كتاب مفتوع , وفي فمه سيجار من نوع ردئ جداُ , ومن الموقد كان ينبعث دخان كريه "

.

الصعوبات اللي بتقابلك في حياتك ماهي إلا إعادة تشكيل لشخصيتك , بتديك دافع إنك تكمل وتعافر علشان تبقي أفضل من اللي انت فيه ..

مفيش حد بيحقق حلمه بسهولة ياجماعة , لازم تتعب , تتعثر , تقف , تكمل , وتقع , ثم تقف مرة أخري لتكمل بقوة أكبر من الأولي ...

إوعي في يوم تلعن ظروفك وتتذمر من حالتك وتركن فشلك علي كلمة " الظروف مش مساعداني " وصدقني مش هتساعدك ..

أي حاجة بنعملها محتاجة صبر , صبر علي كل خطوة قررت تاخدها . لمجرد إنك قررت تاخد الخطوة دي يبقي انت عاوزها فابالتالي لازم تصبر ...

" أصبر وأخلق لنفسك ظروف تلائم عقلك وفكرك "

لغز تكون الحياة فقد تولد المياة من الانفجارات

يضرب البرق بشدة في السماء , تتفجر الحمم من البركين ويؤدي تصاعد الرماد إلي زيادة نسبة ثاني أكسيد الكربون , وفي ظل تلك الظروف تظهر الحياة من بركة صغيرة في شكل كائن وحيد الخلية

كيف ظهرت تلك الحياة ؟؟

.

داروين نفسه لم يقل إنه يفهم أصل الحياة بدقة , ولكن كل اللي قاله كان إفتراض بإن الحياة بدأت في بعض البرك الدافئة .

وفجأة ظهر العالمان جون هالدين و ألكسندر أوبارين سنة 1922 ووضعوا فرضية بتقول إن البرق في الجو الأولي للأرض عمل علي تكوين وحدات البناء الكيميائية للحياة .

وقالوا إم المواد الكيميائية اللي إتكونت في الجو ذابت في البحار القديمة وشكلت بما يسمي " حساء بارد ممدد " وبعدن ظهرت في الحساء ده الخلايا الحية الأولي ..

.

فرضية أوبارين وهالدين فضلت مسيطرة علي العلماء , وعند البعض هي الإعتقاد الصحيح في تفسير كيفية نشأة الحياة .. ولكنها في الأول والأخر تبقي فرضية ليس لها إختبار ..

سنة 1952 جه واحد إسمه هارولد يوري وقال إن الجو الأولي للأرض كان بيحتوي بصفة أساسية علي الهيدروجين والميثان والأمونيا وبخار الماء ..

.

سنة 1953 جه طالب دكتوراة إسمه ستانلي ميلر وقام عامل تجربة تجمع بين فرضة هالدين_ أوبارين  وهي دول البرق في تشكل الحياة , وفرضية يوري في إن الجو كان بيحتوي علي ميثان وأمونيا وهيدروجين وبخار ماء ....

.

ميلر جاب أنبوبة وفرغها من الهواء ووضع بدل الهواء ده ميثان وأمونيا وهيدروجين وماء , وبعدين سخن الماء فنتج بخار الماء وإختلط بالميثان والأمونيا والهيدروجين ( دا اللي قاله هارولد يوري ) وبعدين مرر خليط الغاز ده علي شرارة كهربية تحاكي قوة البرق ( اللي قاله هالدين_أوبارين ) ...

.

ميلر ترك الخليط قرابة إسبوع والأخر كتب ملاحظاته وهي إن الماء تعكر وتحول إلي أحمر داكن وإكتشف فيه بعض المركبات العضوية , ومنها الغليسين والآلانين ودول أبسط حمضين أمينيين في البروتونات , وكانت معظم نواتج التفاعل عبارة عن مواد عضوية لاتتوفر في الكائنات الحية ..

.

المكتشف الاول للمنشور الزجاجي الثلاثي المحلل للضوء

روبرت هوك كان حابب شغل ديكارت علي  الضوء , فجاب منشور وحطه أمام شعاع من الضوء فتحلل الضوء لألوانه السبعة , هنا هوك يعتبر أول من إكتشف الخاصية دي للضوء بس للأسف , هوك فسر الإكتشاف خطأ وقال إن المنشور بايظ .

.

سنة 1672 إشتغل نيوتن علي الضوء وحط منشور تاني بعد المنشور اللي بيحلل الضوء لقي الضوء اتجمع تاني , فقال لأ دي تبقي خاصية في الضوء نفسه

مش خطأ في التجربة .. في نفس الوقت قدم أبحاثه ده للمجتمع الملكي , هنا انتفض هوك وقال ان نيوتن سرق أبحاثه في الضوء , إضطر نيوتن انه يسحب الأبحاث تاني  وقرر عدم نشرها .

قرر نوتن اعتزال كل المناقشات العلمية والمجتمع الملكي نهائي , وكرس كل وقته لدراسة اسرار الكيمياء وكيفية تحويل المعادن الرخيصة لفضة , وحل الغاز الكتاب المقدس وتحدد موعد عودة المسيح . قضي نيوتن في الفترة دي حوالي 10 سنين من عمره ..

.

سنة 1684 كان هوك و رين و هالي قاعدين في قهوة بعد اجتماع الجمعية الملكية وناقشوا موضوع حوكة الكواكب حول الشمي , وأكيد في قوة من الشمس بتحكم الحركة دي وأكيد في قانون للحركة , هنا أتكلم هوك وقال إن الحركة هتبقي " إهلليلجية " فطلب هالي منه القانون قاله حاضر هكتبه وأجيبهولك .

في نفس السنة ذهب هالي لزيارة نيوتن لأول مرة  في بيته ودار بينهم حوار سطره ديموافر علي لسان نيوتن :

سأله هالي : يه هو شكل المدار للكواكب حول الشمس طبقاً لقانون التربيع العكسي ؟

رد نيوتن لحظياً : إهلليلجي

هنا استغرب هالي وقاله انت عرفت منين : قاله لأني عامل الحسابات دي من حوالي 5 سنين

طلب منه هالي الحسابات ووعده نيوتن انه بيعتهاله , نيوتن قعد حوالي 18 شهر في تردد يبعت الحسابات لهالي ولا لأ , لأنه كان خايف يعمل فيه زي هوك , وفعلاً أرسلها لهالي , وطلب منه هالي يكتب كتاب وصد ر الكتاب عام 1687 لي نفقة هالي الشخصية .

 .

سنة 1677 أرسل عوتفريد لابينتس لنيوتن عدة خطابات فيها بعض الأسئلة عن التفاضل , في رد نيوتن علي الخطاب التاني قرر يرد بشفرة علشان لابينتس ميفهمش إكتشافه وقاله :

الموضوع ده سهل جداً بس للأسف مش هقدر أوضحه ليك دلوقتي لذلك كتبته في الشفرة دي

6accdae13eff7i3l9n4o4qrr4s8t12ux.

المشكلة ان في الوقت ده ولا غوتفريد ولا نيوتن كانوا نشروا في التفاضل حاجة , يعني لو كان نيوتن بعت اكتشافاته في التفاضل لغوتفريد كان زمان ليه الأسبقة في الإكتشاف بس كللعادة كان خايف , وده أدي لنزاع طويل أصله :

من إكتشف التفاضل , نيوتن ولا غوتفريد ؟

.

ده تحقيق حبيت أكتبه بس , مش عارف ليه

مليش دعوى !!! كلمة تحوى فلسفة فاشلة

في 30 مايو 2008 في ولاية هارتفورد , كان في راجل كبير إسمه " أنجل توريس "  راجع من السوبر ماركت وفجأة عربة خبطته وجريت ,  المشكلة إن الشارع كان مزدحم جداً بالناس , بس مفيش ولا واحد فيهم فكر يساعده ولا يعرف ماله !! :( :(

المشكلة إن العربيات اللي كانت معدية كانت بتتجنبه وتمشي بعيد عنه وهو مرمي علي الأرض .. !!

عالم النفس " جون دارلي " كان بيتعشي مع صديقه في المهنة " بيب لاتين " =D  فلما قرأوا عن الموضوع إفتكروا حادثة مشابهة للحادثة دي وهي لما سيدة ماتت سنة 1964 بسبب طعنها أكثر من 38 طعنة , وكان ممكن حد يلحقها بس محدش من الناس اللي كانوا واقفين قدم المساعدة ليها لحد ما ماتت للأسف :( :(

.

فلما حاولوا يفسروا الموضوع , قالوا إن الموضوع ده بيتحكم فيه سببين :

السبب الأول :

لازم تكون شايف الموضوع خطير بالنسبة ليك علشان تتدخل وتساعد الشخص اللي في خطر , يعني لو شوفت واحد نايم علي الرصيف هل إنت هتفكر غن الشخص ده عاوز مساعدة !! بالذات غن في ناس كتير جداااااا مروا من جنبه ومحدش ساعده فإنت ممكن تقول إن ده واحد مخمور مثلاً , أو هزار من أي نوع ....

فإنت لما شوفت الناس دي كلها محدش تدخل فغنت تلقائي بتفترض إن الموضوع مش خطير ..

الموضوع ده اطلقوا عليه إسم " الجهل الجماعي Collective Ignorance  "

وده نفس اللي بيحصل معاك في المحاضرة =D =D  أول ما الدكتور يخلص ويسأل " هل حد عنده سؤال ياولاد ؟؟ " إنت بتستني حد يسأل علشان تقنع نفسك إنك مش لوحدك اللي مفهمتش , ولو محدش سأل إنت هتخاف تسأل .. وممكن يكون نص اللي قاعدين زيك مستنيين حد يسأل ..

وهنا قرارات الجماعة ونظرتهم تؤثر علي الفرد

.

السبب التاني :

وجود الأخرين بيكون عائق في تقديم المساعدة , يعني لو انت كنت مع نظير إمبارح وعمل حادثة وتاني يوم لقيته اتوفي لأن محدش ساعده , فإنت هتقول " ربنا يرحمه والله , بس مش انا السبب دا كان في ناس كتير خالص غيري "

أطلقوا علي الظاهرة دي إسم " توزيع المسؤلية " بحيث ان وجود أشخاص كتير بيدفعك تحس بمسؤلية أقل .

امك ثم امك ثم امك حتى اخر يوم في عمرك

حتي الامر كان كدة بالنسبة للعلماء ، كانت الام ليها دور عظيم في حياتهم ، في نشأتهم وحبهم للعلم ودفعهم للأمام .

توماس أديسون قال في كتب من سلسلة عباقرة العلماء " لقد صنعتني أمي, لأنها كانت تحترمني ،و تثق بي أشعرتني أني أهم شخص في الوجود, فأصبح وجودي ضروريا من أجلها ،و عاهدت نفسي أن لا أخذلها كما لم تخذلني قط !! "

كل شئ هتعمله من مساعدتك للناس هتلاقيه والله ، انا والله ماسألت الله شئ الا وأعطاني إياه ، أيا كان الشئ ده فربنا بيعطيني إياه . حتي لو وقعت في مشكلة او عاوز اخلص ورق بلاقي اللي يعرض المساعدة من غير مااطلبها ،

اللي عاوز أقوله

رفقا بوالديكم فهما من يعطيان معني لحياتك ❤❤

ساعد الناس واوعي تستني مقابل حتي لو شكر ، ساعد لوجه الله ، كل ماتعطيه فهو رد ❤❤

صدقني حاجة مش كويسة انك تعلي صوتك علي والدتك او والدك او حتي تدقق فيهم النظر .دا كنز مش هتحس بقيمته الا لما يروح منك . ارضيهم بكل ماتملك بنفسك ،بوقتك ،بمالك ،بكل حاجة .

ادعي انك تكون ابن او بنت بارة وترد جزء من اللي هما عملوه ليك..

ماري كانت ظاهرة جميلة...

سنة 1920  عندما سُئلت ماري كوري عما تتمنى قالت " جرام من الراديوم أتصرف فيه كما أشاء "

مع إن هي اللي اكتشفت الراديوم ولكنها لم تملك منه شيء ، كان فيه حوالي 150 جرام فقط  موزعين على كل المستشفيات ومراكز البحث .

في 20 مايو 1921 وقف الرئيس الأمريكي وارن هاردينغ في ردهة الاستقبال في البيت الأبيض ومعه سفير فرنسا وأعضاء وزارته وقابل إمرأة نحيفة مرتدية ثوب أسود وقال لها :

"  كان من حظك أنك قمت بخدمة خالدة للانسانية ، وقد عهد إلي أن أقدم لكِ هذا القدر الضئيل من الراديوم فنحن مدينون لك بمعرفتنا له وملكنا إياه . لذلك نرفعه إليك واثقين أنه وهو في حيازتك لابد أن يكون وسيلة لتوسيع نطاق العلم وتخفيف ألام الناس "

وتلك كانت ماري كوري

الثائر

انا الثائر وحدى و من سواى
اطوف في الازقة كاتما عن الناس اذاى
نازفا قلبي و محترق بالنداء
و صارخة شفتاى و مسالة دماى
ايا قوم قدموا الثناء
فجارحا انا لحروفي لافديكم بالدماء
اطوف في الشوارع سارحا كاننى الشقاء
لا اعلم ان كنت باحثا ام واجدا ام قد ضيعت عمرى في الفناء
ابحث عن امجاد و اضيع احلام قد باتت لها مشققة عيناى
سائر في الدرب وحدى و قد يواسينى  الشجر
و لكنه معي باحث حتى يلقاه المطر
و منى قد يضحك القمر
الم ترى كم من امثالك لامثالى قد عبر
و انت مازلت ناظرا الى ذاك الحجر (الهرم)
افق فمنهم قد نال الزمان و قد عثر
فاترك ها هنا وحدي الى ان لا يسمع لى خبر

خواطر ادبية و شعر ارتجالى

منى قد تملك الشعر نفسا لن تدوم
و احزانى لها ازمانا خالدات فيها كالنجوم
تعبت روحى ما بين سياسة و حب
كنسر تائه في فضاء بعيد يحوم
اليوم مصرا و غدا محبوبة و نفسي مشتاقة
و انا بينهم حائر ساقط لا اقوم
مالك يا مصر لم تقدمى لى الا الشوك على الازهار
فلم تسل عبر الزمان الا دمائي
و ما زلت موهوما بحبك و على استعداد ان اضحي
 بخلودى ولكن ليس لى سوى فنائي
اتنتشين بالدمع و الحزن
و للفرح كارهة لم انفق عليك الا عنائي
قد سالت دمائي و جفت دموعي ما بين هنا و هناك و كم ذكرت ذاك في قصيدة او عناق
ليس لى ما اثمن منهما كي اوضح بغيرهما افتراق
فقد كنت حاسبا لالام القلب انها من العقل تنبع
كسائر الخواطر و الاحزان بها العقل للقلب يخدع
لا تعجبن يا سامعى فالوعى لعنة مزمنة بها الراحة تهرع
اما الان فقد خضت التجربة و صار قلبي بها يدمع
قد استحال الحب فى قلبي لألم من امل كان للاشجار يزرع
كان يرويها نهر من العشق فصار الان مجراه للبذور نازع
قد رفع ذكراك عاليا و اوصلك السحاب كما الجبال ترفع
لكن قد انهاروا جبالى و جفت انهاري على خطاكى مسرعة
قد رحلتى تاركة خلفك جسر ينبئ بالرجوع
قد ذهبت و فر معك ما كان ساكنا عندى خلف الضلوع
قد ذهبتى و انتهت رحلتنا بأنقط من رثاء بالدموع