ازاى تشترى موبايلك المناسب ليك و لاستخدامك

طبعا كلنا الايام دي في مننا عاوز يشتري تليفون او حد قريبه عاوز يشتري او جاره او او او
ومبنعرفش نختار وبنحتار من كتر  الاجهزة الي موجوده في السوق حاليا
ومبنقدرش نميز اذا كان التليفون هينفعني ولا لا
طب تعالو نشوف اية المعايير الي نقدر نختار التليفون حسب استخدامنا وحاجتنا ليه
ودي بعض الحاجات الي مفروض نشوفها في التليفون قبل ما نشتريه
ونبحث كويس جدا عنها
– الشاشة
– البطارية
– الكاميرا
– الميموري
– المعالج
– دعم التطبيقات

1- الشاشة
قبل ما تشتري التليفون لازم تشوف الشاشه ونوعها وتشوف العيوب قبل المميزات الي فيها
وتحدد انهي انسب ليك وتشوف حجم الشاشه
يعني مثلا لو عاوز شاشه كبيره مش هتجيب تليفون هتجيب تاب بس حط في دماغك ان حجمه ووزنه مش هيبقي زي حجم ووزن الفون العادي
ودي بترجع لاختيار كل واحد

2- البطارية
اكتر حاجه بتضايق اي حد وهو في مشوار بره ان البطارية تفصل
ودا لان سعه البطارية مش مكفية استخدامه اليومي
بس في حلول كتيره لحل الازمه دي زي الباور بانك مثلا
بس لازم عشان تختار بطاريه كويسة في الايام دي وتقضيك طول اليوم استخدام يبقي هتختار بطارية مش اقل من 3000 ملي امبير عشان متشحنش التليفون كتير

3- الكاميرا
ودي اهم جزء لبعض الناس في هذا العالم عشان السوشيال ميديا والي بتحتاج انك تلقط صور وفيديوهات ليك او لاماكن انت فيها وحابب تشاركها مع اصدقائك ويكون جودتها حلوة
اولا متختارش كاميرا اقل من 13 ميجا بيكسل ويكون فتحته العدسه صغيره
وكل ما تزيد امكانيات الهاتف هيزيد سعره اكيد زي مانتو عارفين
وفي ناس مبيفرقش معاها التصويير فجزء الكاميرا مش هيفرق معاه ف حاجه

4- الميموري
انت لو بتحب تحتفظ بالصور والملفات وكدا فتختار ذاكره كبيرة اما لو استخدامك متوسط اختار مساحه تكون 32 جيجا او 64 جيجا

5- المعالج
المعالج فيه ناس كتير مبتهتمش بيه او بيختارو التليفون بناء علي ال 4 حاجات الي قولتهم فوق مع العلم ان المعالج اكتر حاجه بتزود اداء التليفون ويبقي سلس وخفيف معاك عشان تقدر تستخدمه بسرعه وميعطلش من كتر التطبيقات الي عليه فلازم تختار معالج قوي

6- دعم التطبيقات
في بعض التليفونات مبتدعمش كل التطبيقات عشان النظام الي شغال بيه ممكن يكون مش حديث مثلا ف تطبيقات بتشتغل علي اندرويد 7.0 وانت اشتريت تليفون فيه اندرويد 6.0 فقبل ما تشتري شوف نظام الاندرويد الي التليفون نازل بيه وتشوف الشركه الداعمه ليه هتفضل تدعمه وتبعت تحديثات تطور من اداءة ولا لا
يارب اكون قدمت كام نقطه كدا الناس تاخد بالها منها وهي بتشتري
وقبل ما البوست يخلص في موقع كدا تقدر تقارن من عليه وتشوف امكانيات التليفون قبل ما تشتري  وتقدر تقارن تليفونين وتشوف الفرق بينهم
https://www.gsmarena.com/
وكمان لو بتحب التقنيه تقدر تشوف احدث الاخبار من عليه
وياريت بعد ما تقرو البوست تقولو رائيكو والي عنده موضوع عاوزني اكتب عنه يكتب ف كومنت